Тель-Авивда Ўзбекистон мустақиллигининг 35 йиллигига бағишланган байрам кечаси бўлиб ўтди

Тель-Авивнинг “Гейхал ҳа-Тарбут” концерт мажмуасида мамлакат мустақиллигининг 35 йиллигига бағишланган “Ўзбекистондан муҳаббат ила” номли маданий-мусиқий кеча бўлиб ўтди.

Тадбир Бутунжаҳон бухоро яҳудийлари конгресси билан ҳамкорликда ташкил этилди ва унда Исроил ҳукумати, Кнессет депутатлари ҳамда дипломатик корпус вакилларидан иборат 400 дан ортиқ меҳмон қатнашди.

Меҳмонлар эътиборига ўзбек миллий таомлари ҳамда Ўзбекистоннинг туризм салоҳиятига бағишланган сайёҳлик кўргазмаси ҳавола этилди. Мусиқий дастурдан маҳаллий бухоро яҳудийлари ансамблларининг ва Ўзбекистондан таклиф этилган санъаткор Ўлмас Оллобергановнинг чиқишлари ўрин олди.

Мамлакатнинг мустақиллик йилларида эришган ютуқлари, жумладан, сиёсий, ижтимоий-иқтисодий ва маънавий-маърифий соҳалардаги ўзгаришлар, иқтисодиётни модернизация қилиш ва халқаро ҳамкорликни кенгайтиришга алоҳида эътибор қаратилди.

Сўзга чиққан фахрий меҳмонлар, халқлар ўртасидаги тарихий алоқаларни қайд этиб, ўзбек халқининг инсонпарварлиги ва Иккинчи жаҳон уруши йилларида бир миллиондан ортиқ яҳудий кўчманчиларининг Ўзбекистонда қабул қилинганини алоҳида таъкидлади.

Кеча сўнггида иштирокчилар байрам тадбирини ташкил этгани ҳамда Ўзбекистон маданияти ва анъаналарини намойиш қилгани учун ташкилотчиларга миннатдорлик билдирди.